Yaxın Şərqin son illərdə regional güclərindən birinə çevrilən BƏƏ-də daxili siyasi intriqalar intensivləşməyə başlayıb.
Əbu-Dabinin xarici siyasət kursu və bütün əmirliklərə nəzarət etmək arzusu Dubay başda olmaqla digər əmirliklərin təcrid olunmasına, marginallaşmasına və zərər görməsinə gətirib çıxarıb.
İqtisadi baxımdan yeddi əmirlik arasında sərvətin bölüşdürülməsi məsələsində də fikir ayrılıqları var. Bir tərəfdən Əbu Dabi və Dubay, digər tərəfdən isə digər əmirliklər arasında maliyyə uçurumu yaranıb. BƏƏ-nin sərvətləri neftlə zəngin Əbu-Dabi əmirliyində və ticarət və biznesin mərkəzi olan Dubayda cəmləşsə də, xarici siyasətdə Əbu Dabi hegemonluğu tam olaraq ələ keçirib.
Əbu Dabinin İsrail, Qəzza, Yəmən, İran və Qərblə bağlı xarici siyasəti Dubayın ticarət əlaqələrinə və maliyyə sisteminə ziyan vurduğu üçün Dubay 2009-cu ildən bəridir yaşadığı böhrandan birdəfəlik qurtula bilmir.
Görünən odur ki, BƏƏ-dəki hakim ailələrin “soyuq müharibəsi” böyüməkdə davam edəcək. Bu proses isə Körfəz üçün heç də yaxşı gələcək vəd etmir.
